Pa e listanan cu hunto ta conta 100+ empleado of tercera persona.
Esaki en conexion cu control na momento di entregamento.

ORANJESTAD – Servicio di Impuesto ta participa na tur instituto cu mester entrega e lista colectivo di salario (verzamelloonstaat) y e lista colectivo di pago na tercera persona (verzamelstaat opgaaf derden) di aña 2009, cu mester haci un cita prome si ta trata di un of mas lista cu na tur ta conta 100 of mas empleado of tercera persona.

Manera conoci, e aña aki Servicio di Impuesto lo eherce control severo na momento cu entrega e listanan colectivo menciona. Relaciona cu e control aki y pa evita cu e clientenan cu tin lista largo y/of diferente lista ta warda hopi na momento di entregamento, Servicio di Impuesto ta pidi pa haci un cita prome via e-mail: LB-BBOpakket@siad.aw. Esaki ta conta tanto pa esnan cu ta entrega e lista den version digital of hardcopy. Na momento di pidi e cita, mester duna tambe di cada instituto: e cantidad total di empleado y/of tercera persona envolvi.

E demas clientenan no tin mester di haci cita. Nan por acudi na e edificio anexo na Camacuri, na e local banda di unda a busca e pakete di loonbelasting, BBO etc. E orario ta mainta di 8’or pa 12’or y atardi di 1’or pa 4’or.

Mirando cu e ultimo dia pa entrega e listanan colectivo ta 31 di maart 2010 y cu no lo tin mas prolongacion di termino, Servicio di Impuesto ta haci un apelacion na tur cliente y specialmente e conseheronan fiscal, pa entrega e listanan menciona mas pronto posibel y no warda te na ultimo. Mester tene na cuenta cu ta tuma tempo pa controla e listanan. Si warda te na ultimo ta nifica haya un cita mas laat of para den rij y e ora e tempo di espera ta bira mas largo tambe.

GERENCIA DI SERVICIO DI IMPUESTO
28 di januari 2010