Ainda tin 41% di cliente cu plach’i number A cu falta pa haci pago

ORANJESTAD – Servicio di Impuesto ta informa cu falta solamente un siman pa paga impuesto di vehiculo di motor di aña 2010. E ultimo dia pa paga e impuesto aki ta diamars awor, dia 16 di februari. Pa e fecha aki tur persona cu tin un vehiculo di motor (auto, bus, truck, brommer etc.) mester tin por lo menos e prome kwartaal di aña paga y cu e plachi di number color blauw cu blanco riba su vehiculo. Alabes ta asina cu despues di dia 16 di februari e cliente cu no a cumpli ta core risico di perde su number.

Manera conoci dia 15 di februari ta e fecha oficial cu e prome kwartaal ta caduca. Pero debi cu dia 15 ta un dia liber, e ultimo fecha pa haci pago ta bira 16 di februari 2009.
E clientenan por haci pago tanto na Servicio di Impuesto mes of via banco. E clientenan cu ta desea di paga via banco mester tene cuenta cu e condicionan prome cu haci pago. Pa loke ta trata e plachinan di number ta necesario pa presenta e prueba di pago y e prueba di seguro valido y original na momento di busca e plachinan. Si trece copia di seguro, esaki mester tin un stempel original di e compania di seguro of broker.

Pago na Servicio di Impuesto
E cliente cu ta desea di paga na Servicio di Impuesto por haci esaki sea na oficina principal na Camacuri of na un di e oficinanan di gobierno na San Nicolas, Savaneta, Santa Cruz of Paradera.
Manera ya anuncia, te cu dia 16 di februari e oficina principal na Camacuri ta habri non stop for di mainta 7:45 te cu atardi 3:30. E servicio aki no ta conta, pa e oficinanan di gobierno den districto ya cu e oficinanan aki si mester cera merdia.
Alabes Servicio di Impuesto ta participa cu diasabra awor, dia 13 di februari, su oficina principal na Camacuri lo ta habri for di 8:00am te cu 12:00pm.

Tene cuenta
E cliente cu tin plachi di nomber mester haci pago na Servicio di Impuesto mes, ya cu e mester haya un comprobante pa laga traha e plachinan. 

Pago via banco
E clientenan por haci pago via banco tambe. Den e caso aki e siguiente condicionnan ta aplicabel.
1. E cliente por paga unicamente riba plachi di number A of MFA.
2. E cliente ta paga unicamente e impuesto di aña 2010. No ta permiti pa paga e impuesto di dos of
    mas aña fiscal den un solo transaccion.
3. E cliente mester paga e impuesto di ful aña 2010. No por haci pago pa solamente un of mas
    kwartaal di aña 2010.
4. E cliente mester tin e impuesto di aña 2009 completamente paga. Si ainda e cliente no a caba di
    paga e impuesto di aña 2009, e ora e mester acudi na Servicio di Impuesto pa haci pago.
5. No ta permiti pa paga e impuesto di dos of mas number den un solo transaccion.
6. E cliente cu ta desea di paga via internet, por haci esaki via e website di su banco manera
    custumber. 

Busca plachi di number
Na momento di busca e plachinan di number, e cliente mester presenta su comprobante di pago y e prueba di seguro valido manera ya menciona.
E cliente cu a paga na Servicio di Impuesto mes, por pasa busca su plachinan mesora. Pa e cliente cu a paga na Oficina di gobierno San Nicolas, e por scoge pa pasa busca su plachinan di number mesora na Camacuri of e ta palabra cu e cahero ki dia e ta busca su plachinan na San Nicolas mes. Den e caso aki e cliente por busca su plachinan despues di un siman. 

Tene cuenta
E cliente cu a paga via banco no por busca su plachinan di number mesora, sino 3 dia despues di a haci pago.

Incumplimento
Te cu dia 7 di februari ultimo e cantidad di cliente cu no a cumpli cu pago di por lo menos e prome kwartaal ta relativamente halto. Aki ta sigui un skema di e categorianan mas importante.
 

Servicio di Impuesto ta conseha tur cliente pa tene cuenta cu na e momentonan aki ta falta solamente un siman pa haci e pago segun ley. Diamars dia 16 di februari ta ultimo dia pa core cu e plachi di aña 2009. Despues di e fecha aki tur esnan cu no a haci pago di e impuesto y ta uzando nan vehiculo di motor riba careteranan publico ta actuando contra ley. Alabes ta asina cu despues di dia 16 di februari si en caso Servicio di Impuesto no tin number mas disponibel pa bende, e cliente ta core risico di perde su number.
Pesey Servicio di Impuesto ta haci un apelacion na tur cliente cu ainda falta pa haci pago pa haci esaki mas pronto posibel y asina evita di haya boet y perde e number.

GERENCIA DI SERVICIO DI IMPUESTO
8 di februari 2010