Dia 16 di februari ta ultimo dia pa haci declaracion

ORANJESTAD – Servicio di Impuesto ta participa na tur cliente cu ainda no a busca nan paketenan di loonbelasting, BBO, speelvergunningsrecht y/of logeerbelasting cu nan ta core risico di haya boet mirando cu e ultimo fecha pa entrega declaracion ta dia 16 di februari.

Manera conoci tur luna mester haci declaracion y paga loonbelasting, BBO, logeerbelasting y/of speelvergunningsrecht. Dia 16 di februari ta ultimo dia pa haci esakinan y ainda tin bastante cliente cu no a busca nan paketenan cu ta contene e formularionan di declaracion.
Mester tene na cuenta cu si no entrega e declaracion of entrega esaki laat, e cliente lo bay haya un cobransa adicional (naheffingsaanslag) cu lo inclui boet pa incumplimento. E boet aki por bay te maximo Afl. 10.000,-. Pues ta keda den man di e cliente mes pa evita un cobransa adicional si no entrega e declaracion.

Pa busca e paketenan e cliente ta acudi personalmente na Camacuri, na e local situa banda di esun unda ta busca plachi di number di auto. E orario lo ta mainta di 8:00 pa 12:00 y atardi di 1:00 pa 4:00.

Servicio di Impuesto ta haci un apelacion na tur cliente cu ainda no a busca nan pakete pa haci esaki mas pronto posibel.
Pa mas informacion relaciona cu e paketenan di loonbelasting, BBO, logeerbelasting y speelvergunningsrecht, por yama e seccion encarga na e liña directo: 522-7433.

GERENCIA DI SERVICIO DI IMPUESTO
16 di februari 2010