Entrante dialuna, 8 di maart 2010

ORANJESTAD – Servicio di Impuesto ta participa na e cliente – doño di vehiculo di motor - cu na e momentonan aki ainda no a paga e impuesto di vehiculo di motor di aña 2010, cu entrante dialuna awor, dia 8 di maart, ta cuminsa otorga number na otro cliente.
Manera anuncia caba na varios ocasion, pago di e prome kwartaal a caduca dia 16 di februari ultimo. Articulo 11 di e ley di impuesto di vehiculo di motor ta indica, cu despues di e fecha aki, Servicio di Impuesto no tin e obligacion legal di mantene e number riba nomber di un cliente cu no a paga e impuesto. E cliente por haya su mesun number, solamente si e number ta disponibel ainda.

Ta asina cu diariamente tin cliente ta acudi na Servicio di Impuesto cu e peticion pa un number nobo. Si e demanda pa number ta grandi y no tin mas number nobo disponibel, Servicio di Impuesto ta cuminsa otorga e number riba cual ainda no tin pago, na un otro cliente. Na e momentonan aki e stock di number nobo ya ta cabando y Servicio di Impuesto no lo bay laga traha mas plachi di number. Pesey a dicidi pa entrante 8 di maart 2010 cuminsa otorga e numbernan na otro cliente.

Pa evita cu e cliente ta perde su number of ta core risico di haya boet, un bes mas Servicio di Impuesto ta haci un apelacion na tur su clientenan cu ainda no a paga e impuesto di vehiculo di motor di aña 2010 pa cumpli cu e pago mas pronto posibel.
Servicio di Impuesto na diferente ocasion ta duna informacion no solamente di e ultimo fecha cu pago di un kwartaal mester tuma lugar pero tambe di e consecuencianan. Sinembargo cumpli cu pago di e impuesto envolvi, ta responsabilidad di e cliente mes.

GERENCIA DI SERVICIO DI IMPUESTO
1 di maart 2010