No lo tin mas prolongacion di termino

ORANJESTAD – Servicio di Impuesto ta recorda tur cliente cu e ultimo dia pa entrega e resumen di pago di salario (verzamelloonstaat) y e resumen di pago na tercera persona (verzamelstaat opgaaf derden) di aña 2009, ta 31 di maart 2010. Por entrega e formulario original yena of un file digital. Entregamento di e resumennan ta obligatorio y den caso di incumplimento e cliente lo por ricibi un cobransa adicional inclui boet. Sinembargo un cliente no tin mester di ricibi un cobransa adicional. Ta den su mes man pa evita esaki.

No lo tin mas prolongacion di termino
Normalmente mester a entrega e resumennan menciona dia 31 di januari ultimo, pero debi cu e aña aki Servicio di Impuesto ta eherce control severo na momento di entregamento, a dicidi di duna prolongacion di termino general te cu dia 31 di maart 2010. Kiermen e clientenan a haya dos luna mas di tempo pa yena nan formularionan. Despues di 31 di maart 2010 no ta posibel pa haya mas prolongacion di termino.

Con por entrega e resumennan menciona?
Tin 2 manera pa entrega e resumennan menciona:
1. e cliente ta yena y entrega e formularionan original;
2. e cliente ta entrega e formularionan yena den forma digital uzando e MS Excel file
'e-Verzamelstaat 2009' di Servicio di Impuesto of un otro programa di payroll.

Pues e cliente mes ta dicidi si e ta skirbi e datonan na man of e ta procesa e datonan digitalmente. No ta importa cua manera e cliente ta scoge, pero den tur 2 caso mester entrega e formularionan original firma bek.

Kico ta pasa si no cumpli cu entregamento?
Si e cliente no entrega e 'verzamelloonstaat' y e 'verzamelstaat opgaaf derden' of no entrega esakinan na tempo, e ta core risico pa haya boet. E boet aki por suma te un maximo di Afl. 10.000,- y ta depende cuanto empleado of tercera persona e cliente tin. E boet ta depende tambe pa kico tawata tin incumplimento, sea ta pa entregamento laat of no entregamento.

Cobransa adicional
Despues di dia 31 di maart 2010 Servicio di Impuesto lo cuminsa procesa e cobransanan adicional (naheffingsaanslagen) inclui boet pa e clientenan cu no a entrega e resumennan menciona of a entrega esakinan laat. Un cliente no tin mester di ricibi un cobransa adicional si el a cumpli debidamente. Asina e no ta hay’e ta paga extra innecesariamente.

Servicio di Impuesto ta conseha e clientenan pa percura yena e formularionan di e 'verzamelloonstaat' y e 'verzamelstaat opgaaf derden' di aña 2009 corectamente y completamente y entrega esakinan mas pronto posibel. No warda te na ultimo pasobra mester tene cuenta cu ta tuma tempo pa eherce e controlnan na momento di entregamento. Si warda te na ultimo ta nifica menos tempo pa haci coreccion, paramento den rij y e ora e tempo di espera ta bira mas largo tambe.

GERENCIA DI SERVICIO DI IMPUESTO
12 di maart 2010