Diaranson awor ta ultimo dia pa entrega e plachinan di number

ORANJESTAD – Servicio di Impuesto ta participa cu tin posibilidad pa haya dispensacion di impuesto di vehiculo di motor durante aña 2010. Esaki ta conta pa e cliente cu tin un vehiculo di motor cu no ta den uzo y no lo bay ta den uzo pa un periodo minimo di 3 luna. Den un caso asina tin chens cu e cliente no tin mester di paga e impuesto si e cumpli cu e condicionnan.
E prome condicion ta cu mester entrega e plachinan di number y e ultimo dia pa haci esaki ta diaranson awor, dia 31 di maart. Esaki ta debi cu e di dos kwartaal ta cuminsa dia 1 di april y mester paga e impuesto delanta. Aki ta sigui un splicacion mas amplio.

E condicionnan
Un cliente no tin mester di paga e impuesto di un of mas kwartaal durante aña solamente si cumpli cu e siguiente condicionnan.
1. E cliente mester entrega e plachinan di number na Servicio di Impuesto prome cu un kwartaal cuminsa. Na e momentonan aki e ultimo dia pa entrega e plachinan ta diaranson awor, dia 31 di maart.
2. E cliente a laga e plachinan aden pa un kwartaal of mas completo durante aña.
3. Ta reserva e number pa e aña fiscal coriente, esta aña 2010.

Entregamento di plachi
Por entrega e plachinan di number sea na oficina principal na Oranjestad of na un Oficina di gobierno den districto.
E cliente ta acudi cerca un cahero pa yena y firma un formulario. Pa medio di e formulario e cliente ta declara cu e ta entrega e plachinan di su vehiculo. Alabes e cliente ta duna e motibo pakico e ta entrega su plachinan; por ehempel: pa motibo di biahe largo, vehiculo ta daña etc. Despues ta entrega e formulario hunto cu e plachinan na e cahero.

Si doño di vehiculo a fayece
Den caso cu doño di e vehiculo a fayece, un miembro di famia por entrega e plachinan. Alabes ta posibel cu casa di e fayecido ta autorisa un persona pa haya e number. Eventualmente e herederonan tambe por laga pasa e number riba nomber di e persona cu nan ta desea. Tur e herederonan mester firma pa e traspaso di number y nan ta apodera un persona pa regla esaki. Servicio di Impuesto tin e formulario ‘Verklaring van geen bezwaar bij voertuig overdracht’ cu e herederonan por uza. Despues ta entrega e carta di apoderacion y un notificacion di fayecimento di Censo.

Periodo cu plachi ta keda aden
Un otro condicion pa bin na remarca pa dispensacion di impuesto ta cu e plachinan mester a keda aden pa un kwartaal (of mas) completo. E plachinan di number cu keda entrega na e momentonan aki lo por cay bou dispensacion di impuesto pa e di dos kwartaal, esta april, mei y juni 2010. Mester tene cuenta si, cu den caso cu busca e plachinan bek durante luna di april, mei of juni, lo mester paga e di dos kwartaal toch completamente.
Por ehempel: si e vehiculo tawata daña durante april y e doño a busca e plachinan bek na mei, e ora toch e mester paga e impuesto di e di dos kwartaal completamente. E dispensacion no ta conta pa cada luna cu e plachi a keda aden sino pa cada kwartaal di aña.

No tin dispensacion cu forsa retroactivo
No ta duna dispensacion di impuesto cu forsa retroactivo. Esaki ta debi cu mester paga e impuesto delanta. Un cliente cu entrega su plachinan na e momentonan aki, no por haya dispensacion mas pa e prome kwartaal di aña 2010 (januari, februari y maart) debi cu e kwartaal aki a cuminsa caba.

Dispensacion no ta conta pa gasto di plachi
Un cliente por haya dispensacion pa e impuesto solamente y no pa gasto di e plachinan. Semper e cliente lo mester paga Afl. 20,- pa gasto di plachi.

Ta reserva e number pa aña 2010
Servicio di Impuesto ta reserva e plachinan di number solamente pa e aña fiscal coriente, esta aña 2010. Durante e periodo aki ta reserva e number tambe pa e doño di vehiculo. Despues di aña 2010, e cliente ta core riesgo di perde su number despues di e fecha 15 di februari 2011, conforme ley, si acaso e no reacciona.

Pagamento di belasting ta un deber di nos tur, pero pagamento di mas ta den man di e cliente mes. Pues esnan cu tin un vehiculo cu no ta bay ta den uzo pa minimo e proximo tres lunanan, esaki ta e momento pa actua. Tene cuenta si cu e condicionnan menciona. Si entrega e plachinan di number despues di dia 31 di maart 2010, no por haya dispensacion mas pa e di dos kwartaal.

GERENCIA DI SERVICIO DI IMPUESTO
25 di maart 2010