ORANJESTAD – Servicio di Impuesto ta participa cu dia 28 di april ultimo Parlamento a aproba algun cambio den e ley di logeerbelasting. E cambio di ley ta encera cu entrante 1 di mei 2010 e tarifa di logeerbelasting ta bira 7,5%. Alabes a formalisa e actual maneho di tarifa relaciona cu ‘time-shares’ y paketenan ‘all-inclusive’.
Tarifa di 7,5%
E actual tarifa di logeerbelasting ta 6% y ta valido te cu april 2010. Entrante 1 di mei 2010 mester haci declaracion y pago di logeerbelasting a base di e tarifa nobo di 7,5%. E prome declaracion y pago segun e tarifa nobo aki mester sosode den e periodo entre 1 y 15 di juni proximo, cu ta e momento cu mester haci declaracion y pago di mei 2010.
Servicio di Impuesto ta pidi su clientenan pa pone atencion cu riba e formulario di declaracion ta menciona e tarifa di 6%, pero esaki no ta valido mas entrante 1 di mei 2010. E clientenan por keda uza e mesun formularionan di declaracion cu nan a ricibi, teniendo cuenta si cu e tarifa nobo ora di haci declaracion di mei 2010 en adelante.
Tarifa di ‘time-shares’
Alabes a formalisa e tarifa pa calcula e compensacion ora ta trata di ‘time-shares’. Esaki ta nifica cu a hinca e tarifanan cu ya tawata wordo aplica den ley. E tarifanan di ‘time-shares’ ta lo siguiente:
a. Afl. 179,- pa dia pa un studio;
b. Afl. 193,95 pa dia pa un apartamento di un camber;
c. Afl. 223,75 pa dia pa un apartamento cu no ta cay bou punto a of b ya menciona.
Tarifa di pakete ‘all-inclusives’
A formalisa tambe e tarifa existente pa calcula e compensacion di paketenan ‘all-inclusive’. E tarifa aki ta 40% di e prijs total cu a acorda cu e huesped y minimo Afl. 162,- pa dia. Den caso cu tin algun pago adicional (toeslagen), ta conta esakinan tambe hunto den e prijs total.
Pa mas informacion por consulta e website www.siad.aw.
GERENCIA DI SERVICIO DI IMPUESTO
5 di mei 2010