Asina cliente por paga su debe pocopoco y cumpli cu su obligacion

ORANJESTAD – Servicio di Impuesto ta recorda su clientenan kendenan tin debe di belasting, cu ta posibel pa haci un areglo di pago y asina paga e debe pocopoco y cumpli cu e obligacion pa cu belasting.
Ta asina cu un cliente tin e obligacion legal pa cumpli cu pago di un cobransa dentro di e termino cu ley ta indica. Si e pago no sosode debidamente, automaticamente lo start e proceso di cobramento cu gradualmente por bira mas severo. Si cumplimento di pago ta causa dificultad financiero, por haci peticion pa un areglo di pago.

Kico ta un areglo di pago?
Un areglo di pago ta un combenio por escrito entre Servicio di Impuesto y un cliente, unda tur dos partido ta haci un palabracion pa paga e debe - di un of mas cobransa - dentro di un termino mas largo.

Mester haci peticion pa haya areglo
Servicio di Impuesto no ta aplica un areglo di pago automaticamente. Pa haya un areglo mester haci un peticion por escrito, den cual ta duna un splicacion di e motibonan. Na seccion Servicio pa Cliente por haci e peticion pa un areglo di pago te un maximo di 10 luna. Si mester un areglo di un periodo mas largo, mester haci un cita cu un asina yama “invorderaar”. E funcionario aki ta specialisa den asunto di cobramento y e lo atende e cliente personalmente. Servicio di Impuesto ta evalua tur peticion pa areglo di pago y ta dicidi si ta honra e peticion of no.

Na unda ta entrega e peticion?
Mester entrega e peticion na seccion Servicio pa Cliente na oficina principal na Camacuri of Oficina di gobierno na San Nicolas.

Un areglo NO ta conta automaticamente pa tur cobransa
Na momento cu cera un areglo di pago ta basa esaki riba e debe di belasting cu tin na e momento ey. Si acaso despues e cliente a ricibi otro cobransa, esaki no ta cay den e areglo palabra caba. E cliente lo tin cu paga e cobransa (cu el a ricibi despues) separa di e areglo. Si acaso e situacion aki ta trece dificultad financiero, e cliente por acudi na Servicio di Impuesto pa haci un adaptacion den su areglo existente. Den un caso asina lo por cera un areglo nobo basa riba e saldo nobo di e debe.

Mas informacion
Pa mas informacion e cliente por acudi na e seccion Servicio pa Cliente na oficina principal na Camacuri of na Oficina di gobierno na San Nicolas.

GERENCIA DI SERVICIO DI IMPUESTO
25 di juni 2010