Pago di e impuesto mester sosode prome cu juli cuminsa

ORANJESTAD – Servicio di Impuesto ta recorda tur doño di vehiculo di motor cu diaranson awor, dia 30 di juni, ta e ultimo dia pa paga e di tres kwartaal di impuesto di vehiculo di motor (motorrijtuigbelasting) 2010. E di tres kwartaal aki ta trata e lunanan juli, augustus y september y pago di e impuesto mester sosode delanta, esta prome cu juli cuminsa.

E clientenan por haci nan pago na oficina principal na Camacuri of na un oficina di gobierno sea na Paradera, Santa Cruz, Savaneta of San Nicolas. Alabes Servicio di Impuesto ta recorda cu no ta posibel pa haci pago di impuesto di vehiculo di motor cu cheque personal sino cu placa cash of debit card. Pa un servicio mas rapido ta pidi pa trece e recibo(nan) di pago di e aña aki.

Na esnan cu ainda no a paga e prome y/of di dos kwartaal ta bay un conseho pa haci esaki mas pronto posibel. Mas ta suspende e pago, mas lo mester paga despues.
Pa esnan cu ainda ta coriendo cu plachi bieu, ta conta cu no ta sigur cu nan tin e number ainda. Posibilidad ta grandi cu ya nan a perde e number. Alabes ta asina cu e clientenan aki no lo haya un number nobo tanten cu no paga e number bieu prome pa e periodo(nan) cu a uza e number.

Tur doño di vehiculo di motor cu ta haci uzo di e careteranan publico tin e deber di cumpli cu pago di e impuesto manera ley ta stipula.
Servicio di Impuesto ta conseha tur cliente cu ta paga den termino pa tene cuenta cu e terminonan legal y haci e pagonan manera stipula. Esaki ta importante pa evita cualkier inconveniencia.

GERENCIA DI SERVICIO DI IMPUESTO
25 di juni 2010