Asina e procesamento por bay mas lihe despues

ORANJESTAD – Servicio di Impuesto ta participa cu lo eherce control estricto na momento di entrega e formulario di declaracion (aangiftebiljet) di winstbelasting di aña 2009. Esaki ta nifica cu no lo djis accepta e declaracion pero tambe lo controla mesora si e declaracion ta completamente yena. Si tin mas cu dies (10) declaracion pa entrega, mester haci un cita. Despues di a haci e controlnan necesario, Servicio di Impuesto lo duna e cliente un comprobante di entregamento. Aki ta sigui un splicacion mas amplio.

Control
Prome cu acepta un formulario di declaracion, Servicio di Impuesto lo controla e declaracion riba e siguiente puntonan:

1. Mester entrega e formulario original yena y firma bek. E formulario original tin un label y barcode riba dje. Si a uza un programa pa yena e formulario digital mester pone e printout como anexo na e formulario original.

2. No por cambia e aña fiscal cu ta aparece riba e formulario.

3. Mester firma e declaracion. Si un consehero ta bay firma e declaracion pa su cliente, mester tin un carta di apoderacion acerca.

4. Menciona por lo menos un number di telefon riba pagina 3 di e declaracion.

5. Yena e sumanan na florin di Aruba. No ta acepta suma yena na dollar Mericano, Euro of otro moneda.

6. Mester yena tur seccion cu ta aplicabel pa e empresa.

7. Yena tur seccion - completamente - cu ta forma parti di:
        a. activa y pasiva di empresa (fiscale vermogensopstelling) y
        b. calculacion di ganashi fiscal (fiscale winstberekening).
   Esaki ta nifica cu den un seccion:
        a. no por yena e suma total of subtotal solamente;
        b. no por laga un pregunta habri y yena e cifra '0' como subtotal of total;
        c. no por laga e seccion habri y referi na e cuenta anual.

8. Yena e cifra '0' na tur pregunta si e empresa no tawata activo durante aña 2009. Den e caso aki no tin mester di entrega e cuenta anual, pero si mester entrega e declaracion.

9. Mester inclui e cuenta anual como anexo.

10. Si ta entrega un anexo cu no ta di Servicio di Impuesto (pues sin e logo) mester menciona:
         a.  e nomber di empresa; 
         b.  e 'persoonsnummer' di empresa; 
         c.   e seccion na cual e anexo ta referi.

11. Si tin cambio di accionista of dirigente (pregunta 4a) mester yena tambe e formulario 'Bijlage aangifte winstbelasting bestuurders/aandeelhouders'.

Ta sumamente importante pa cumpli cu tur e puntonan menciona pa evita cu ta debolbe e declaracion bek na e cliente. Si e declaracion ta completo y corecto, e procesamento tambe por sosode lihe despues.

Entregamento
Por entrega e declaracion na oficina principal na Camacuri of Oficina di gobierno na San Nicolas.
E conseheronan of representantenan cu tin mas cu dies declaracion pa entrega, mester pidi un cita via e-mail: aangifte@siad.aw. Menciona den e e-mail cuanto declaracion ta bay entrega. Servicio di Impuesto lo contesta via e-mail ki dia y ki ora por acudi pa entrega e declaracionnan.

Comprobante di entregamento
Ta duna comprobante di entregamento despues cu a controla e declaracion. Servicio di Impuesto no ta duna comprobante si a deposita e declaracion den postbus.
Tambe por stempel e copia di declaracion pa esaki keda como comprobante di entregamento pa e cliente. Ta remarca cu e cliente mes mester percura pa saca copia di tur su documentonan. Servicio di Impuesto no ta duna servicio di saca copia.

Ultimo dia pa entrega declaracion
E ultimo dia pa entrega e declaracion di winstbelasting 2009 ta 1 di September 2010. Ta consehabel pa entrega e declaracion mas pronto posibel y no warda te na ultimo.
Mester tene na cuenta cu ta tuma tempo pa eherce e control. Si warda te na ultimo ta nifica haya un cita mas laat of para den rij y e ora e tempo di espera ta bira mas largo tambe.

Servicio di Impuesto ta haci un apelacion na tur cliente y specialmente e conseheronan fiscal of representantenan, pa entrega e declaracionnan teniendo debido cuenta cu tur e puntonan menciona ariba. Asina despues Servicio di Impuesto por procesa e declaracionnan mas rapido y evita atraso.

GERENCIA DI SERVICIO DI IMPUESTO
13 di juli 2010