Oranjestad – Manera conoci, diariamente Servicio di Impuesto y Servicio di Aduana ta duna servicio na un cantidad grandi di cliente, kendenan ta acudi na nan oficina entre otro pa haya informacion y/of busca documento.
Servicio di Impuesto y Servicio di Aduana ta consciente cu dunamento di informacion ta un parti esencial di dunamento di servicio. E website www.siad.aw ta un instrumento di comunicacion importante entre e organisacion y su clientenan, ya cu e ta permiti brinda servicio mas eficientemente. Pa medio di www.siad.aw, un cliente por haya servicio na un manera facil y lihe riba su asunto di belasting y/of duana, sintando tras di computer den comodidad di su cas of oficina. Pesey Servicio di Impuesto y Servicio di Aduana ta invita su clientenan cordialmente pa bishita www.siad.aw.
E cliente ta central
Como organisacion cu ta duna servicio y ta pone e cliente central, Servicio di Impuesto y Servicio di Aduana kier cumpli mas tanto posibel cu demanda di e clientenan. Pesey a diseña www.siad.aw saliendo for di punto di bista di e cliente. Esaki ta nifica cu e cliente ta busca informacion a base di su situacion personal.
Contenido di www.siad.aw
E cliente cu bishita www.siad.aw por haya informacion di cualkier asunto di belasting y/of aduana, por ehempel:
• informacion general di asunto di belasting y/of duana
• formulario pa haci cambio di adres, cambio di banco
• formulario pa pidi persoonsnummer, declaracion di conducta fiscal
• aclaracion di inkomstenbelasting, BBO etc.
• textonan di ley
Servicio tur momento
Pa medio di www.siad.aw, Servicio di Impuesto y Servicio di Aduana por duna servicio 24 ora pa dia y 7 dia pa siman. Alabes un cliente por haya contesta rapido y facil riba su pregunta.
Presentacion di e website
Pa cu presentacion di www.siad.aw a mantene e reglanan di e presentacion visual di Servicio di Impuesto y Servicio di Aduana teniendo cuenta cu e factornan: moderno, atractivo, sin buya, transparente y cu ilustracion.
Alabes a percura pa e structura di nabegacion ta uno simpel y diseña pa yega lihe na informacion specifico sin tin mester di habri hopi menu.
Informacion simpel y bon categorisa
Pa loke ta informacion, a percura pa e textonan ta bon categorisa, actual, completo, corecto, comprendibel y bon accesibel esta uzando texto cortico, firme, cla y presenta den forma facil pa lesa.
Mester remarca cu constantemente lo keda amplia y adapta e contenido pa asina keda suministra mas informacion actual y corecto, cumpliendo asina mas tanto posibel cu demanda di e clientenan.
Servicio di Impuesto y Servicio di Aduana ta directamente accesibel
Debi cu Servicio di Impuesto y Servicio di Aduana ta forma parti di SIAD, a percura pa e organisacionnan aki ta directamente accesibel pa medio di un conexion fiho cu ta dirigi e bishitante di un organisacion pa otro y vice versa. Pues un bishitante cu ta riba e website di Servicio di Impuesto por bishita esun di Servicio di Aduana facilmente, door di click riba e ‘link’ di Servicio di Aduana poni mas ariba di un pagina. Mescos ta conta pa e bishitante di Servicio di Aduana cu kier bay riba e website di Servicio di Impuesto.
SIAD, Servicio di Impuesto y Servicio di Aduana ta recomenda tur cliente pa bishita y explora www.siad.aw ampliamente y asina cera conoci cu e diferente opcionnan di servicio cu tanto di Servicio di Impuesto como Servicio di Aduana ta brinda durante 24 ora y 7 dia pa siman.
GERENCIA DI SIAD
15 di oktober 2010