Esaki ta un derecho hancra den Ley general di impuesto

ORANJESTAD – Servicio di Impuesto ta recorda e clientenan cu no ta di acuerdo cu un cobransa (aanslag), cu tin posibilidad pa entrega un carta di obhecion. Esaki ta un derecho hancra den Ley general di impuesto y ta importante pa tur cliente tin conocemento di esaki.

Con ta entrega e carta di obhecion
Pa loke ta e carta di obhecion, e cliente mes por skirbi su carta of e ta uza e formulario nobo di Servicio di Impuesto ‘Bezwaar/uitstel van betaling aanslagen’. E formulario aki ta disponibel tambe riba e website www.siad.aw.
Si sosode cu un cliente tin obhecion contra mas di un cobransa, e por traha un solo carta di obhecion pa tur e cobransanan cu e no ta di acuerdo cu nan. E formulario ‘Bezwaar/uitstel van betaling aanslagen’ ta duna e cliente espacio pa haci obhecion contra 3 cobransa. Si e cliente tin obhecion contra mas di 3 cobransa, e ora e cliente por yena mas formulario y pone nan hunto.

Splica e obhecion
Den e carta di obhecion ta splica detayadamente pakico no ta di acuerdo cu e cobransa. Si ta trata di obhecion contra mas di un cobransa, ta importante pa duna un splicacion riba cada cobransa. E splicacion aki ta hopi importante pa inspector por tuma den su evaluacion na momento cu ta trata e obhecion. Un bon splicacion ta yuda hopi pa por soluciona cualkier desacuerdo mas lihe.

Peticion pa pospone pago
Banda di e splicacion pakico no ta di acuerdo cu e cobransa, e cliente mester inclui tambe den su carta, cua parti di suma di cobransa e no ta di acuerdo cu ne. Servicio di Impuesto lo trata esaki como un peticion pa pospone pago riba e suma aki. Despues di evaluacion e cliente lo ricibi un contesta por escrito si ta honra su peticion of no.

Entregamento di carta di obhecion
Alabes ta importante pa tene na cuenta cu mester entrega e carta di obhecion dentro di dos luna despues di fecha di e cobransa. Esaki ta e termino stipula pa ley. Si entrega e carta di obhecion despues di dos luna, tin posibilidad cu Inspector ta declara e obhecion no admisibel y ta evalua si ta bay trata e obhecion of no. Alabes e cliente por perde su derecho di bay den apelacion na hues despues.
Si acaso un cliente a entrega su carta di obhecion laat y toch ta di opinion cu su obhecion ta admisibel, e ora e mester duna e motibonan pakico e no por a entrega su obhecion mas prome. Den e caso aki e cliente lo mester presenta su pruebanan.
Servicio di Impuesto ta conseha pa na momento di entrega e carta di obhecion, trece tambe un copia di e carta pa por stempel esaki. E copia aki lo keda como prueba di entregamento pa e cliente.

Despues di evalua e obhecion y e peticion pa pospone pago, e cliente lo ricibi un contesta por escrito.

Pa mas informacion por consulta nos website www.siad.aw.

GERENCIA DI SERVICIO DI IMPUESTO
15 di november 2010