Esaki ta conta pa vehiculo cu no ta bay ta den uzo durante e prome kwartaal

ORANJESTAD – Servicio di Impuesto ta participa cu ta posibel pa haya dispensacion di
impuesto di vehiculo di motor pa e prome kwartaal di aña 2011. Esaki ta conta pa cliente cu tin
un vehiculo di motor cu no ta bay ta den uzo den e prome kwartaal di aña 2011, esta di januari
te cu maart 2011. Pa por haya dispensacion di belasting mester cumpli cu e condicionnan.
Un di e condicionnan ta cu mester entrega e plachinan di number dia 3 di januari 2011. Aki ta
sigui un splicacion mas amplio.

E condicionnan
E condicionnan pa haya dispensacion di belasting ta:
1. Mester entrega e plachinan di number di aña 2010 na Servicio di Impuesto prome cu e
kwartaal cuminsa. Esaki ta nifica cu pa e prome kwartaal di aña 2011, e unico dia cu
mester entrega e plachinan y paga Afl. 20,00 ta dia 3 di januari 2011. Si e cliente
presenta despues di e fecha di 3 di januari 2011 pa entrega su number di auto, Servicio
di Impuesto ta reserva e derecho di cobra pa e prome kwartaal 2011 mas e Afl. 20,00 di
gasto.
2. Ta laga e plachinan aden pa un kwartaal of mas completo durante aña 2011.
3. Ta reserva e number pa e aña fiscal, esta aña 2011.
4. Seguro di auto cu a wordo cancela no ta wordo acepta como prueba cu cliente no a usa
e plachinan.

Entregamento di plachi
Mester acudi na un cahero y pidi un formulario. Pa medio di e formulario e cliente ta declara cu
e ta entrega e plachinan di su vehiculo y ta duna un splicacion di e motibonan, por ehempel: pa
motibo di biahe largo of vehiculo ta daña. Despues ta firma y entrega e formulario hunto cu e
plachinan na e cahero.
Por entrega e plachinan di number sea na oficina principal na Oranjestad of na e oficinanan di
gobierno na San Nicolas, Savaneta, Sta. Cruz of Paradera.

Cancelacion di Seguro
Na momento cu e plachinan di number di auto di e aña vigente wordo entrega na e cliente, no
ta acepta cancelacion di seguro como prueba cu no a hasi uso e plachinan. Den caso cu e
cliente no ta bai hasi uso di e plachinan y ta cancela e seguro di e vehiculo, e cliente mester
entrega e plachinan di e vehiculo pa hanja dispensacion.

Si doño di vehiculo a fayece
Den caso cu doño di e vehiculo a fayece, un miembro di famia por entrega e plachinan of e
casa di e fayecido por autorisa un persona pa haya e number. Tambe ta posibel pa e
herederonan laga pasa e number riba nomber di e persona cu nan ta desea. Tur e herederonan mester firma pa e traspaso di number y nan ta apodera un persona pa regla esaki. Servicio di
Impuesto tin e formulario ‘Verklaring van geen bezwaar bij voertuig overdracht’ cu e
herederonan por uza. Despues ta entrega e carta di apoderacion y un notificacion di
fayecimento di Censo.

Periodo cu plachi ta keda aden
Un otro condicion pa dispensacion di impuesto ta cu e plachinan mester a keda aden pa e
kwartaal (of mas) completo. E dispensacion no ta conta pa cada luna cu e plachi a keda aden
sino pa cada kwartaal. Esaki ta nifica cu si busca e plachinan bek durante e kwartaal, toch lo
mester paga e belasting di e kwartaal ey completamente.
Por ehempel: si e vehiculo tawata daña den luna di januari y e doño a busca e plachinan bek
na februari, e ora toch mester paga e impuesto di e prome kwartaal completamente.

No tin dispensacion cu forsa retroactivo
Debi cu mester paga e impuesto delanta, no ta duna dispensacion cu forsa retroactivo. Pues e
clientenan cu entrega nan plachinan despues di dia 3 di januari 2011, no ta bin na remarca pa
dispensacion pa e prome kwartaal di aña 2011.

Dispensacion no ta conta pa gasto di plachi
E dispensacion ta conta pa e impuesto solamente y no pa gasto di e plachinan. E clientenan cu
ta desea di bin na remarca pa dispensacion di impuesto pa e prome kwartaal di 2011, lo mester
paga Afl. 20,- y inmediatamente yena e formulario pa entrega e plachinan.

Ta reserva e number pa e aña fiscal
Servicio di Impuesto ta reserva e plachinan di number solamente pa e aña fiscal, esta aña
2011. Durante e periodo aki ta reserva e number tambe pa e doño di vehiculo.
Pa e clientenan cu ta bin na remarca pa dispensacion di impuesto pa e ultimo kwartaal di aña
2010, mester tene na cuenta cu si nan no reacciona ora aña 2011 habri, nan ta core riesgo di
perde nan number despues di dia 15 di februari 2011.
Pagamento di belasting ta un deber di nos tur, pero pagamento di mas ta den man di e cliente
mes. Pues esnan cu tin un vehiculo cu no ta bay ta den uzo pa minimo e tres lunanan di un
kwartaal, mester actua prome cu e kwartaal cuminsa. Semper mester tene cuenta si cu e
condicionnan menciona.

GERENCIA DI SERVICIO DI IMPUESTO
23 di december 2010