ORANJESTAD – Servicio di Impuesto ta informa tur cliente-doño di trabou, cu entrante awe e paketenan di loonbelasting 2011 lo wordo manda. Cada doño di trabou lo ricibi esun di dje den e dianan venidero. E pakete ta consisti di tur formularionan y informacion necesario encuanto e cobramento di loonbelasting y prima di AOV/AWW y AZV pa aña 2011.
Pues e doño di trabou ta ricibi entre otro e formularionan di declaracion, e aclaracion necesario y e tarifa di prima di AOV/AWW y AZV valido pa aña 2011. Alabes e doñonan di trabou ta ricibi e formularionan di aña 2010 cualnan mester wordo yena y entrega na su debido tempo. Ta trata aki di e lista colectivo 2010 di salario (verzamelloonstaat) y e lista colectivo di pago haci na tercera persona 2010 (verzamelstaat opgaaf derden).
Servicio di Impuesto ta conseha pa controla e pakete bon, principalmente si tin 12 formulario di declaracion y si cada un tin e imprenta di e periodo corecto (un formulario pa cada luna). Ta sumamente importante pa tur doño di trabou tin tur informacion pa asina durante aña 2011 e por retene e loonbelasting y e primanan di AOV/AWW y AZV di e empleadonan corectamente. Mescos ta conta pa e declaracionnan y e pagonan durante aña 2011.
Pa e doño di trabou cu tin dos of mas empresa propio (eenmanszaak), esaki ta nifica cu e no lo ricibi un pakete di loonbelasting 2011 pa cada empresa, sino solamente un pakete cu ta conta pa tur su empresanan propio. Pues e doño di trabou cu tin dos of mas empresa propio lo haci declaracion di henter e personal di tur su empresanan hunto pa medio di un solo declaracion di loonbelasting, prima di AOV/AWW y AZV cual e ta entrega cada luna. Mescos ta conta pa e pago. Cada luna e doño di trabou lo paga un solo suma di loonbelasting/prima di AOV/AWW y prima di AZV di tur su empresanan hunto.
Pa mas informacion por tuma contacto cu Servicio di Impuesto na tel. 522-7423 of pasa personalmente na e loket di informacion na oficina principal na Camacuri of e Oficina di Gobierno na San Nicolas.
GERENCIA DI SERVICIO DI IMPUESTO
4 di januari 2011