Ta consehabel pa no warda te na ultimo momento

ORANJESTAD – Siguientemente Servicio di Impuesto ta participa cu e ultimo dia pa entrega e lista colectivo di salario (verzamelloonstaat) y e lista colectivo di pago na tercera persona (verzamelstaat opgaaf derden) di aña 2010, ta 31 di maart 2011. Despues di e fecha aki lo cuminsa procesa e cobransanan adicional inclui boet pa incumplimento.

Normalmente mester entrega e listanan menciona dia 31 di januari 2011, pero debi cu e paketenan di loonbelasting a sali laat e biaha aki y teniendo cuenta cu e control cu ta eherce na momento di entregamento y e periodo cortico, Servicio di Impuesto a dicidi di prolonga e termino di entregamento.

E prolongacion di termino ta sosode automaticamente pa tur cliente. Pues no tin mester di haci peticion. Servicio di Impuesto ta duna e prolongacion aki un solo biaha. Despues di 31 di maart 2011 lo cuminsa procesa e cobransanan adicional (naheffingsaanslagen) inclui boet pa e clientenan cu no a entrega e listanan menciona. Den e caso aki e boet pa incumplimento ta maximo Afl. 10.000,-.
Cu e prolongacion di termino, e clientenan por haya mas espacio pa yena nan listanan corectamente y completamente.

Servicio di Impuesto ta haci un apelacion na tur cliente pa entrega e listanan menciona mas pronto posibel y no warda te na ultimo. Mester tene na cuenta cu ta tuma tempo pa controla e listanan. Si warda te na ultimo ta nifica menos tempo pa haci coreccion, paramento den rij y e ora e tempo di espera ta bira mas largo tambe.

GERENCIA DI SERVICIO DI IMPUESTO
10 di januari 2011