Alabes, awor e suma maximo deducibel pa donacion ta Afl. 50.000,-

Oranjestad – Servicio di Impuesto ta participa di un cambio di ley cu a tuma lugar recientemente y ta trata e institutonan cu mester wordo reconoci fiscalmente en conexion cu deduccion di donacion. Alabes a adapta e suma maximo di deduccion pa cu donacion haci. E cambio di ley ta conta tanto pa e ley di inkomstenbelasting como e ley di winstbelasting.

Ta asina cu cierto institutonan mester a haci un peticion na Minister di Finansas pa por a wordo reconoci fiscalmente en conexion cu deduccion di donacion. Door di reconoce e instituto, cualkier persona of empresa cu a haci donacion na un instituto asina, por a deduci e donacion aki for di su entrada of ganashi fiscal.

Entrante 1 di januari 2011 no ta rekeri mas pa un instituto haci un peticion na Minister di
Finansas. E rekisito legal ta cu e instituto mester ta estableci na Aruba y mester ta di indole eclesiastico, caritativo, cultural, deportivo of scientifico. Institutonan cu meta di promove interes general tambe ta cay bou e stipulacion aki.

Alabes a adapta e suma maximo cu por deduci como donacion. Awor esaki no ta Afl. 10.000,- mas sino Afl. 50.000,-.
Es decir, tur persona of empresa cu haci un donacion na un instituto di e indole manera menciona akiriba, por bin na remarca pa haya deduccion di e donacion te na un suma maximo di Afl. 50.000,- y asina paga menos inkomstenbelasting of winstbelasting.
Mester tene na cuenta si cu mester inclui e comprobante di pago den e declaracion di inkomstenbelasting of winstbelasting pa inspector por evalua e donacion.

GERENCIA DI SIAD
25 maart 2011