Asina e declaracion ta completo y corecto

ORANJESTAD – Servicio di Impuesto ta haci un apelacion na tur cliente cu tin e deber di entrega su declaracion di loonbelasting tur luna, pa percura pa declara e 'reparatietoeslag' debidamente den e declaracion, pa asina esaki ta completamente y corectamente yena.

Reparatietoeslag y declaracion
Manera conoci, entrante 1 di januari 2011 a introduci 'reparatietoeslag' cu fin di mehora e poder di compra pa esnan cu un salario entre sueldo minimo y Afl. 2500 pa luna. En conexion cu esaki Servicio di Impuesto a haci cambio den e formulario di declaracion di loonbelasting, den cual e cliente mester declara lo siguiente:

• e cantidad di empleado;
• e cantidad di empleado cu a ricibi 'reparatietoeslag';
• e suma total cu a paga na salario;
• e sumanan cu mester paga na loonbelasting, prima di AOV/AWW y prima di AZV;
• deduci un suma como 'reparatietoeslag' segun e sistema cu ley ta prescribi;
• calcula e suma cu finalmente mester paga na loonbelasting, prima di AOV/AWW y AZV.

Prome cu yena e datonan den e declaracion ta consehabel pa verifica esakinan cuidadosamente pa evita erornan den calculacion.
Na cuminsamento di aña e clientenan a ricibi un guia aclaratorio cu mas splicacion riba 'reparatietoeslag' y e declaracion. No obstante, durante e procesamento di e declaracionnan a constata cu hopi declaracion ta incompletamente of incorectamente yena.

Declaracionnan yena completo y corecto ta evita tardansa den procesamento di e datonan y ta disminui e risico pa e cliente di haya un cobransa adicional inclui boet. Servicio di Impuesto ta urgi tur doño di trabou cu te dia di awe no a paga e 'reparatietoeslag' na su empleadonan, pero cu si lo kier haci uzo di e posibilidad pa deduci e 'reparatietoeslag' di su loonbelasting, prima di AOV/AWW y AZV, pa haci esaki ainda.

www.siad.aw
Por consulta e website www.siad.aw pa haya mas informacion relaciona cu declaracion di loonbelasting y 'reparatietoeslag'. Servicio di Impuesto ta haci un apelacion na tur cliente y specialmente e clientenan cu tin dificultad pa cu yenamento di declaracion di loonbelasting, pa consulta www.siad.aw y asina evita cu e declaracion ta incompletamente of incorectamente yena. Empleadonan cu tin e sospecho cu nan doño di trabou no a paga nan e 'reparatietoeslag' aunke nan tin derecho riba dje, por entrega un keho por escrito na Servicio di Impuesto.

GERENCIA DI SERVICIO DI IMPUESTO
17 di mei 2011