ORANJESTAD – Relaciona cu e cobransa di grondbelasting 2011 Servicio di Impuesto ta informa lo siguiente.
E cobransa aki a sali durante luna di juni y ta fecha 7 di juli 2011. Manera custumber un cliente por scohe pa paga esaki den un solo biaha of den termino. E cliente cu no por paga su cobransa dentro di e terminonan legal, por haci un peticion pa areglo di pago. Mester haci e peticion aki mas pronto posibel. Asina e cliente mes por evita cu Servicio di Impuesto ta continua cu e proceso di cobramento cu gradualmente por bira mas severo.
No a ricibi cobransa
E clientenan cu pa un of otro motibo no a ricibi nan cobransa di aña 2011 mester acudi na oficina principal di Servicio di Impuesto na Camacuri mas pronto posibel y pidi un duplicado di e cobransa. E persona cu ta pidi e duplicado mester identifica su mes sea cu cedula, paspoort of rijbewijs. Ta importante pa busca e duplicado mirando cu e prome y di dos termino di pago a caduca caba.
Termino di pago
Aki ta sigui un skema di e terminonan legal di pago cu ta conta pa e cobransa di aña 2011:
|
Grondbelasting 2011 fecha 7 di juli 2011
|
|
Termino di pago
|
Ta caduca dia
|
Pago rekeri pa ley
|
|
Di prome y di dos termino
|
8 di augustus 2011
|
Pago rekeri ta 50% di e suma di cobransa pa cubri e prome y di dos kwartaal: jan – maart 2011 y
april – juni 2011.
|
|
Di tres termino
|
30 di september 2011
|
Pago rekeri ta 25% di e suma di cobransa pa cubri e di tres kwartaal: juli – sept 2011.
|
|
Di cuater termino
(ultimo termino)
|
31 di december 2011
|
Pago rekeri ta 25% di e suma di cobransa pa cubri e ultimo kwartaal: oktober – december 2011.
|
|
Pa dia 31 di december 2011 e cobransa di aña 2011 mester ta completamente paga.
|
Areglo di pago
Den caso di dificultad financiero, e cliente por acudi na seccion Servicio pa Cliente pa haci un peticion pa areglo di pago di maximo 10 luna. Pa areglo di pago di mas cu 10 luna e cliente mester haci un cita cu un funcionario specialisa den asunto di cobramento, un asina yama 'invorderaar', kende lo atende e cliente personalmente. Mester tene na cuenta cu e cobransa di grondbelasting 2011 no ta bay automaticamente den areglonan di pago existente. Pa inclui e cobransa den un areglo di pago mester haci un peticion nobo. Servicio di Impuesto ta evalua tur peticion pa areglo y ta dicidi si ta honra e peticion of no.
Posibel restitucion
Servicio di Impuesto por tene cuenta cu posibel restitucion. Pa esaki e cliente mester cumpli cu e siguiente condicionnan:
1. Ta haci un peticion por escrito den cual ta duna un calculacion di e suma di restitucion cu ta sperando.
2. Mester a entrega tur e declaracionnan (aangiftebiljetten) di inkomstenbelasting te cu aña 2009.
Servicio di Impuesto ta evalua e peticion y si honra esaki, e cliente lo paga su cobransa di grondbelasting te ora cu su cobransa definitivo di inkomstenbelasting sali y esaki resulta den restitucion di belasting. Den un caso asina automaticamente lo desconta e debe di grondbelasting for di e suma di restitucion.
Si e pago no sosode
Den caso cu e cliente no a paga segun e termino legal of areglo of no a paga suficiente, e ora Servicio di Impuesto por cuminsa cu e proceso di cobramento mesora despues cu un termino di pago of areglo caduca. Esaki ta nifica cu no lo tene cuenta mas cu e demas terminonan pa haci e otro pagonan. Pues, practicamente e cliente ta perde su derecho pa paga e resto di e cobransa den e terminonan cu ta sigui. Pesey ta consehabel pa tene cuenta cu e terminonan di pago y haci e pagonan manera ley ta stipula of manera e areglo di pago ta indica. Esaki ta importante pa evita cualkier inconveniencia.
Pa mas informacion encuanto e cobransa of areglo di pago, e cliente por acudi na seccion Servicio pa Cliente na oficina principal na Camacuri 2 of Oficina di Gobierno na San Nicolas.
Servicio di Impuesto ta conseha tur cliente pa lesa e texto imprimi riba e cobransa cu hopi atencion y asina e clientenan ta pone nan mes miho na altura tambe di e tipo di cobransa aki.
GERENCIA DI SERVICIO DI IMPUESTO
29 di augustus 2011