Mescos ta conta pa entrega e peticion pa prolongacion di termino

Oranjestad – Servicio di Impuesto ta participa cu dialuna awor, dia 3 di november 2008, ta e ultimo dia pa entrega e declaracion di inkomstenbelasting 2007. Mester remarca cu e fecha aki ta conta solamente pa esnan cu a ricibi nan formulario cu fecha oficial di otorgamento: 1 di september 2008. Pues aki ta trata di e clientenan kendenan tawata registra caba. E clientenan nobo kende recientemente a wordo registra, pa nan e fecha di 3 di november menciona no ta conta. Nan termino pa yena y entrega e formulario ta cuminsa core for di e fecha di otorgamento registra riba nan formulario y ta caduca 2 luna despues.

Entregamento
E clientenan por entrega nan declaracion na oficina principal na Camacuri of na oficina ausiliar di gobierno na San Nicolas. E orario di servicio ta mainta for di 7:45 te cu 11:45 y atardi for di 1:15 te cu 3:30.

Trece copia 
Servicio di Impuesto ta recomenda su clientenan pa trece un copia di e declaracion tambe ora di entregamento pa por pone un stempel riba dje. Esaki ta facilita e entregamento y e copia ta keda tambe como e prueba di entregamento pa e cliente. 

Prolongacion di termino
Pa e cliente kende no ta alcansa pa entrega su formulario, tin posibilidad ainda pa pidi prolongacion di termino. E ultimo dia pa entrega e peticion ta dialuna awor tambe, dia 3 di november 2008. Tur peticion cu drenta despues di dia 3 di november no lo wordo honra.

Pa haci e peticion e cliente por yena e formulario “Uitstel indiening aangifte inkomstenbelasting premies volksverzekeringen”. E cliente por acudi na e oficina principal na Camacuri of na oficina ausiliar di gobierno na San Nicolas. Alabes por baha e formulario menciona via e website www.siad.aw. 
Tur cliente cu a haci un peticion pa prolongacion di termino lo ricibi un contesta por escrito di Servicio di Impuesto.

Un deber di nos tur
Tur e clientenan kendenan a ricibi e formulario di declaracion tin e deber di yen’e y entreg’e na tempo.  Door di yena y entrega e formulario, e cliente tin oportunidad di declara e entrada cu realmente el a gana. Ademas e ta haci uzo di su derecho pa deduci su gastonan cu ta fiscalmente acceptabel.
Keda sin entrega e declaracion ta nifica cu e cliente ta core risico di haya un cobransa taxativo. Esaki ta nifica cu inspector mes lo bay calcula e entrada fiscal na momento cu e ta bay saca e cobransa. Un cobransa taxativo normalmente ta sali inclui e but pa incumplimento di e declaracion. E but aki ta 5% di e impuesto, minimo Afl. 250,- y maximo Afl.10.000,-. E but aki ta conta tambe pa esnan cu entrega nan formulario laat.

GERENCIA DI SERVICIO DI IMPUESTO
30 di october 2008