Ya caba un cantidad grandi di cliente a perde nan number

ORANJESTAD – Servicio di Impuesto ta participa na e cliente – doño di vehiculo di motor - cu na e momentonan aki ainda no a paga e impuesto di vehiculo di motor di aña 2009, cu tur dia e ta core risicio di perde su number apesar cu e por tawatin e number pa hopi aña caba.

Ta asina cu regularmente tin cliente ta acudi na Servicio di Impuesto pa un number nobo. Si e demanda pa number ta grandi y no tin mas number nobo disponibel, Servicio di Impuesto ta cuminsa otorga e number riba cual ainda no tin pago, na un otro cliente. Esaki ta sosodiendo tur dia y pesey e clientenan cu ainda no a paga e prome kwartaal di aña 2009, no tin siguransa cu e number ainda ta di nan.

E pago di e prome kwartaal a caduca dia 16 di februari ultimo. Articulo 11 di Ley di impuesto di vehiculo y boto di motor ta indica, cu despues di e fecha aki, Servicio di Impuesto no tin e obligacion legal di mantene e number riba nomber di un cliente cu no a paga e impuesto. E cliente por haya su mesun number, solamente si e number ta disponibel ainda. Esaki ta depende di e demanda pa number.
Servicio di Impuesto na diferente ocasion ta duna informacion no solamente di e ultimo fecha cu pago di un kwartaal mester tuma lugar pero tambe di e consecuencianan. Sinembargo cumpli cu pago di e impuesto envolvi, ta responsabilidad di e cliente.

Pa evita cu e cliente ta perde su number of ta core risico di haya boet, un bes mas Servicio di Impuesto ta haci un apelacion na tur su clientenan cu ainda no a paga e impuesto di vehiculo di motor di aña 2009 pa cumpli cu e pago mas pronto posibel. Na e momentonan aki e impuesto di mita aña mester ta paga caba. Mas hopi e cliente ta pospone e pago mas risico e ta core y mas hopi e mester paga despues.

GERENCIA DI SERVICIO DI IMPUESTO
27 di april 2009