Oranjestad – Servicio di Impuesto ta participa cu entrante dialuna, dia 22 di juni, su personal ta duna
ayudo pa yena e formulario di declaracion di inkomstenbelasting di aña 2008 tanto na Club Don Bosco
Noord como na oficina principal na Camacuri.

Kendenan por participa?
E clientenan cu por participa ta:
· e persona soltero cu su entrada bruto ta maximo Afl. 50.000,- pa aña;
· e persona casa y hunto cu su pareha e entrada bruto ta maximo Afl. 100.000,-.
Manera custumber, e campaña no ta pa persona cu tin negoshi of cu ta traha riba su mes.

Aki ta sigui un skema cu informacion di e campaña

Fecha	Ta duna ayudo na	Luga	Orario
22 - 30 di juni	Tur cliente	Club Don Bosco - Noord y  Servicio di Impuesto Camacuri	8:00 - 3:30 non stop
• Pa ricibi ayudo no tin mester di haci cita. • Diasabra dia 27 di juni tambe ta duna ayudo.

Servicio di Impuesto ta pidi tur cliente pa no lubida di trece tur documento necesario relaciona cu e
entradanan tanto na Aruba como den exterior y e gastonan di aña 2008. Si acaso tin yiu ta studia den
exterior mester bin cu comprobante di inscripcion di scol y e recibonan di gasto por ehempel plac’i scol,
material di estudio y/of gasto di pasashi pa e yiu bin Aruba. E mayor(nan) mes mester a cubri e gastonan aki.

Trece copia
Servicio di Impuesto ta recomenda pa trece un copia di e formulario na momento di entrega esun
original. Asina por pone un stempel riba e copia cual lo keda tambe como prueba di entregamento.
Servicio di Impuesto ta conseha pa no keda sin yena y entrega e formulario di declaracion. Door di yena y entrega e formulario na tempo, e cliente por evita un cobransa taxativo y ademas e tin oportunidad pa haci uzo di su derecho pa deduci e gastonan cu ta fiscalmente acceptabel. Si keda sin entrega e formulario of a entrega esaki laat, e cobransa lo inclui un boet di 5% di e impuesto cu un minimo Afl. 250,- y maximo Afl.10.000,-.

Mester tene cuenta cu e ultimo dia pa entrega e formulario ta 1 di juli proximo y riba e dia aki no lo duna ayudo. Pesey Servicio di Impuesto ta conseha pa no warda te na ultimo y acudi mas pronto posibel pa haya ayudo.

GERENCIA DI SERVICIO DI IMPUESTO
19 di juni 2009