Na e clientenan di SIAD, Servicio di Aduana y Servicio di Impuesto

Oranjestad – SIAD ta participa na tur cliente di SIAD, Servicio di Aduana y Servicio di Impuesto, cu ta posibel pa entrega un keho na momento cu un cliente no a keda satisfecho cu e servicio ricibi. “Laga nos sa.” Un keho por yuda pa adapta e servicio unda ta necesario.

Ta asina cu e organisacionnan menciona diariamente ta duna servicio na un cantidad grandi di cliente. Cada organisacion y su empleadonan ta haci nan best pa duna servicio mas miho posibel. Toch por sosode cu un cliente no a keda satisfecho cu e comportacion sea di e organisacion of di un empleado y ta sinti e necesidad di expresa su mes. E ora tin posibilidad pa entrega un keho.

Por tin diferente motibo pakico un cliente por entrega un keho por ehempel:
- e cliente no a haya e informacion rekeri;
- e cliente no a haya un cita;
- e cliente no a ricibi un documento riba e fecha palabra;
- e organisacion no a contesta telefon of a keda pasa e yamada sin resultado satisfactorio.
Apesar cu tur keho ta importante, toch tin algun keho cu no lo trata por ehempel:
- keho anonimo;
- keho publica den prensa;
- keho riba e contenido di un ley y e stipulacionnan pa cu e ehecucion.

Pa entrega un keho e cliente mester haci esaki por escrito of e por autorisa un otro persona. E cliente mes por skirbi e carta of ta yena un formulario cual ta obtenibel na oficina principal di Servicio di Impuesto of Servicio di Aduana. E carta mester contene e siguiente datonan:
- nomber, adres y firma;
- e fecha, e sitio di e incidente y si ta posibel e orario;
- un descripcion cortico y cla di e keho.

Despues e cliente ta deposita e keho den e box di keho na oficina principal di e organisacion riba cual e keho ta relaciona cu ne.
Despues di entrega e keho, lo registra esaki y e cliente lo haya un carta di confirmacion.

Siguientemente lo start cu tratamento di e keho durante cual lo haci un investigacion. Na final e cliente lo ricibi un contesta por escrito. Mester remarca cu lo trata un keho cu tur seriedad y lo mantene tur informacion confidencial.

Tanto SIAD, Servicio di Aduana y Servicio di Impuesto ta haya importante pa su clientenan ta satisfecho y ta reconoce e derecho pa entrega keho. Alabes un keho ta un forma di feedback valioso riba e servicio di cual e organisacion por siña di dje. Asina eventualmente por adapta e servicio na unda ta necesario pa mehora esaki.

Pa mas informacion relaciona cu entregamento di keho por consulta e website www.siad.aw.
Via e website aki por download tambe e foyeto di keho y e formulario pa entrega keho.

GERENCIA DI SIAD
Na nomber di SIAD, Servicio di Impuesto y Servicio di Aduana
19 di juni 2009