Oranjestad – Servicio di Impuesto ta participa cu falta algun dia so pa su campaña di ayudo pa yena e
formulario di declaracion di inkomstenbelasting di aña 2008, termina. Na e momentonan aki ta duna ayudo tanto na Club Don Bosco Noord como na oficina principal na Camacuri y esaki lo continua te cu
dia 30 di juni. Esaki ta nifica cu ainda tin solamente 4 dia di ayudo ya cu entrante 1 di juli e personal
disponibel lo bay bek na nan trabou normal. Ta spera cu lo bira mas druk den e ultimo dianan aki y pesey ta conseha pa acudi mas trempan posibel.

Kendenan por participa?
E clientenan cu por participa ta:
· e persona soltero cu su entrada bruto ta maximo Afl. 50.000,- pa aña;
· e persona casa y hunto cu su pareha e entrada bruto ta maximo Afl. 100.000,-.
Manera custumber, e campaña no ta pa persona cu tin negoshi of cu ta traha riba su mes.

Aki ta sigui un skema cu mas informacion tocante e ayudo

Fecha	Luga	Orario
26, 27, 29 y 30 di juni	Club Don Bosco - Noord y  Servicio di Impuesto Camacuri	8:00 - 3:30 non stop
• Pa ricibi ayudo no tin mester di haci cita. • Diasabra dia 27 di juni tambe ta duna ayudo.

Servicio di Impuesto ta pidi tur cliente pa no lubida di trece tur documento necesario relaciona cu e
entradanan tanto na Aruba como den exterior y e gastonan di aña 2008.

Trece copia
Servicio di Impuesto ta recomenda pa trece un copia di e formulario na momento di entrega esun
original. Asina por pone un stempel riba e copia cual lo keda tambe como prueba di entregamento.

Servicio di Impuesto ta conseha pa no keda sin yena y entrega e formulario di declaracion. Door di yena y entrega e formulario na tempo, e cliente por evita un cobransa taxativo y ademas e tin oportunidad pa haci uzo di su derecho pa deduci e gastonan cu ta fiscalmente acceptabel. Si keda sin entrega e formulario of a entrega esaki laat, e cobransa lo inclui un boet di 5% di e impuesto cu un minimo Afl. 250,- y maximo Afl.10.000,-.
 
Mester tene cuenta cu e ultimo dia pa entrega e formulario ta diaranson awor, dia 1 di juli, y riba e dia aki no lo duna ayudo mas pa yena e formulario. Pesey Servicio di Impuesto ta conseha pa no warda te na ultimo y acudi mas pronto posibel na e sitionan menciona.

GERENCIA DI SERVICIO DI IMPUESTO
25 di juni 2009