E fecha oficial di otorgamento ta 1 di augustus 2009

ORANJESTAD – Servicio di Impuesto ta informa cu e formularionan di declaracion di winstbelasting 2008 a sali. Ta trata aki di e formulario pa empresa estableci na Aruba cu ta cay bou ley di winstbelasting (por ehempel: N.V. of fundacion). E fecha oficial di otorgamento ta 1 di augustus 2009 y pa e fecha aki e empresanan mester a ricibi e formulario menciona. E empresanan estableci den exterior y e companianan di seguro lo ricibi nan formulario di declaracion mas despues durante aña.

E pakete cu e clientenan lo ricibi ta contene: e formulario di declaracion 2008 y dos formulario como anexo na e declaracion, den cual mester declara informacion di e dirigentenan y e accionistanan di e empresa.

Servicio di Impuesto ta haci un apelacion na tur empresario pa yena tur e formularionan cu atencion y contesta tur e preguntanan. Despues ta firma y entrega e declaracion hunto cu e anexonan (informacion di dirigente y accionista, relato anual y su respectivo aclaracion y demas documento di importancia).

Tanto e formulario di declaracion como e anexonan na e formulario ta disponibel riba e website: www.siad.aw. Mester remarca cu e cliente por download e formulario di declaracion solamente pa propio uzo y no pa entrega como declaracion oficial. Semper mester entrega e formulario original. Dentro di poco e buki di aclaracion tambe lo ta disponbel riba website.

Entrega declaracion dentro di 2 luna
E empresa cu a ricibi e formulario di declaracion tin 2 luna pa yena y entrega esaki. E ultimo dia pa entrega e formulario ta 1 di october 2009. Ta importante pa tene cuenta cu e termino di 2 luna aki, ya cu e empresa ta core riesgo di haya boet si no entrega e formulario of si entreg’e laat.

Trece copia
Por ultimo Servicio di Impuesto ta pidi su clientenan pa ora di entrega e formulario trece un copia tambe pa por pone un stempel riba dje. Esaki ta facilita e entregamento y e cliente ta keda cu e prueba di entregamento riba su copia.

GERENCIA DI SERVICIO DI IMPUESTO
13 di juli 2009