Unda publico por haya mas informacion di Servicio di Impuesto y Servicio di Aduana 

Oranjestad – SIAD ta participa na tur cliente tanto di Servicio di Impuesto como Servicio di
Aduana cu entrante diasabra, 1 di augustus, por cera conoci cu su website nobo: www.siad.aw.
Manera conoci, Servicio di Impuesto y Servicio di Aduana ta e dos organisacionnan cu ta cay
bou SIAD y diariamente ta duna servicio na un cantidad grandi di cliente, kendenan ta acudi
entre otro pa haya informacion y/of busca documento.

Como organisacion cu ta duna servicio, Servicio di Impuesto y Servicio di Aduana ta pone e
cliente central. Pesey e website nobo ta enfoca riba e sistema di duna informacion saliendo for
di punto di bista di e cliente. Ta nifica cu e cliente ta busca informacion dependiendo di su
situacion. Alabes a percura pa e structura di nabegacion ta uno simpel y diseña pa yega lihe na
informacion specifico sin tin mester di habri hopi menu.
Pa loke ta e contenido, a percura pa e textonan ta bon categorisa, actual, completo, corecto,
comprendibel y bon accesibel esta uzando texto cortico, firme, cla y presenta den forma facil pa
lesa. Mester remarca cu lo keda amplia y adapta e contenido pa constantemente por
suministra mas informacion actual y corecto cumpliendo asina mas tanto posibel cu demanda di
e clientenan.

Servicio di Impuesto y Servicio di Aduana ta pertenece na SIAD y pesey a percura tambe pa e
organisacionnan aki ta directamente accesibel pa medio di un conexion fiho cu ta dirigi e
bishitante di un organisacion pa otro y vice versa. Pues un cliente cu ta bishita e parti di
Servicio di Impuesto por bishita esun di Servicio di Aduana facilmente, door di djis klik riba e
“link” di Servicio di Aduana poni mas ariba na cada pagina. Mescos ta conta pa e bishitante di
Servicio di Aduana cu kier bishita e parti di Servicio di Impuesto.

Servicio di Impuesto y Servicio di Aduana ta consciente cu dunamento di informacion ta un parti
esencial di dunamento di servicio y e website ta un instrumento di comunicacion importante
entre e organisacion y su clientenan ya cu e ta permiti pa brinda servicio mas eficientemente.
Tanto SIAD, Servicio di Impuesto como Servicio di Aduana ta spera cu e website www.siad.aw
ta na agrado di nan clientenan cu ta prefera haya servicio na cualkier momento sintando tras di
computer den comodidad di nan cas of oficina.

GERENCIA DI SIAD
31 di juli 2009