vrijdag 18 september 2009 - Pronto Aruba lo cera tratado pa intercambia informacion cu Francia, Belgica y Alemania
Oranjestad – Recientemente un delegacion di SIAD tawata na Francia unda a negosha un tratado fiscal yama Tax Information Exchange Agreement (TIEA). E delegacion di SIAD a consisti di sra. Ritza Lopez-Hernandez y sra. Anita ten Hove. Di parti di Francia a tuma parti na e negoshacionnan
sr. Guillaume Drano y sra. Aurélie André. E negoshacionnan a bay hopi bon y ambos pais a yega na un acuerdo relaciona cu e texto di e TIEA y a parafeer e concepto di ley. E acto aki a tuma lugar na Paris, dia 9 di september ultimo.
Awor tanto Aruba como Francia ta bay inicia e proceso pa e TIEA por wordo firma mas pronto posibel. Di parti di Aruba mester haya aprobacion prome di Conseho di Minister di Reino pa e ministro encarga cu asunto di belasting por firma e TIEA.
Alabes e delegacion di SIAD tawata na Den Haag, Hulanda, unda dia 11 di september a negosha un TIEA cu Belgica y dia 14 di september cu Alemania y a yega na un acuerdo riba e texto di e TIEA cu e paisnan aki tambe.
Un TIEA ta un tratado entre paisnan cu e meta pa stimula e cooperacion internacional riba tereno fiscal door di intercambia informacion. A base di un tratado asina, Francia por intercambia informacion cu Aruba si e informacion aki ta relevante pa un aplicacion corecto di e leynan nacional di belasting. Por ehempel: si un compania mama cu ta estableci na Francia, a ricibi dividend di un compania stranhero afilia cu ta opera na Aruba, e ora e compania mama no lo mester paga belasting na Francia riba e dividend ricibi. Pues door di cera un TIEA cu Francia esaki por favorece invershon na Aruba for di Francia.
Aruba ta trahando duro pa cera tratado di intercambio di informacion cu diferente otro pais. Aruba tin TIEA caba cu Hulanda, Antias Hulandes, Merca y Spaña, Australia, Noruega, Dinamarca, Finlandia, Suecia, Groenland, IJsland, Faroes Islands, Saint Vincent and the Grenadines, British Virgin Islands and Saint Kitts and Nevis.
Manera conoci, desde 10 di September ultimo Aruba a yega e cantidad di 12 TIEA cu OECD (Organisacion for Economic Cooperation and Development) ta exigi pa no aparece riba nan lista gris. Pues internacionalmente ya no ta considera Aruba mas como un paraiso fiscal. Esaki ta un logro hopi grandi y importante riba tereno fiscal. No obstante, Aruba ta sigui negosha cu diferente otro pais pa cera mas TIEA y asina demostra cu Aruba tambe ta combati actonan criminal pa cu impuesto.
GERENCIA DI SIAD
18 di september 2009