Mester trece comprobante di seguro valido na momento di busca e plachinan. E seguro aki mester ta valido di 4 di januari 2010 en adelante.

ORANJESTAD – Servicio di Impuesto ta participa cu dialuna awor, dia 7 di december, su clientenan por cuminsa haci pago delanta di impuesto di vehiculo di motor (motorrijtuigenbelasting) di aña 2010. E clientenan por haci pago tanto na Servicio di Impuesto mes of via banco. E clientenan cu ta desea di paga via banco mester tene cuenta cu e condicionan prome cu haci pago. Pa loke ta trata e plachinan di number ta necesario pa presenta e prueba di pago y e prueba di seguro valido na momento di busca e plachinan. Pa aña 2010 e color di e plachinan di number ta fondo blauw cu letter y/of cifra blanco.

Pago na Servicio di Impuesto
E cliente cu ta desea di paga na Servicio di Impuesto por haci esaki sea na oficina principal na Camacuri of na un di e oficinanan di gobierno na San Nicolas, Santa Cruz of Paradera.

Orario di caha
Na Camacuri di dialuna pa diabierna: mainta di 7:45 pa 11:45 y atardi di 1:15 pa 3:30.
Na Oficina di gobierno San Nicolaas, Santa Cruz of Paradera di dialuna pa diabierna: mainta di 8:30 pa 11:45 y atardi di 12:15 pa 2:45.

Con por haci pago?
E cliente por paga sea cu placa cash, “debit card” (maestro), bankcheque of kassiercheque. Tene cuenta cu pa impuesto di vehiculo di motor no ta posibel pa paga cu cheque personal.

Rekisitonan ora di haci pago
Pa haci e servicio mas eficiente y lihe Servicio di Impuesto ta pidi su clientenan pa no lubida di trece:
1. Prueba di registro di e vehiculo di Servicio di Impuesto.
2. Recibonan di pago di aña 2009.
3. Permiso valido pa plachi B, TX, V, O y T.

E clientenan cu ainda debe impuesto di aña 2009 lo mester caba di paga esaki prome cu paga e impuesto di aña 2010.
Pa plachi di number cu ta exigi un permiso (vergunning) manera bus, taxi, v-auto, plachi “O” y “T”, e cliente/portador di e permiso por haci pago unicamente na e oficinanan di Servicio di Impuesto. Esaki ta pa motibo cu mester controla si e permiso ta valido na momento di haci pago. Si e permiso no ta valido e cliente no por paga e impuesto. Den un caso asina e cliente mester regla su permiso na DOPV prome.

Prueba di seguro valido
Tur cliente mester tene na cuenta cu su vehiculo mester ta sigura sino e no por ricibi su plachinan di number. E seguro mester ta valido entrante 4 di januari 2010. Esaki ta nifica cu si e seguro ta caduca prome cu e fecha aki, e cliente no lo ricibi su plachinan.

Pago via banco
E clientenan por haci pago via banco tambe. Den e caso aki e siguiente condicionnan ta aplicabel.

1. E cliente ta paga unicamente e impuesto di aña 2010. No ta permiti pa paga e impuesto di dos of mas aña fiscal den un solo transaccion.
2. E cliente mester paga e impuesto y gastonan di plachi di full e aña 2010. No por haci pago pa solamente un of mas kwartaal di aña 2010.
3. E cliente mester tin e impuesto di aña 2009 completamente paga. Si ainda e cliente no a caba di paga e impuesto di aña 2009, e ora e mester acudi na Servicio di Impuesto pa haci pago.
4. Pa plachi cu ta exigi un permiso (B-TX-T-O-V) no ta posibel pa haci pago via banco.
5. No ta permiti pa paga e impuesto di dos of mas number den un solo transaccion. 
6. Pa esnan cu ta paga via internet, mester tene cuenta cu e opcion di pago via “bill payment” no ta posibel. Si ta posibel pa haci transferencia (funds transfer) pa cuenta di Servicio di Impuesto cu e descripcion menciona akibou. 

Con ta haci pago via “bank tansfer” (internet)?
Pa pago via banco e cliente ta sigui e siguiente pasonan.

PASO 1

Prepara e siguiente informacion:
1. Number di registro (persoonsnummer)
2. Number di plachi
3. Conta e suma di impuesto pa aña + e suma di plachi pa aña (20,00)

PASO 2

Scoge opcion di transferencia (“funds transfer”)

PASO 3

Den e hoki di descripcion ta yena:
Persoonsnummer – plachi di number – periodo di pago
Ehempel: 1234567 – A 1327 – voljaar 2010

PASO 4

Yena e suma total di impuesto
E suma total di impuesto ta consisti di e tarifa di impuesto di ful e aña mas Afl. 20,- di gasto di e plachinan. E suma di impuesto ta para riba e formulario di registracion.
Si e suma di impuesto ta Afl. 300,-, e ora e suma total di pago ta Afl. 320,- (300,- + 20,-).

Nota: si e cliente no paga e gasto di e plachinan (Afl. 20,-) e no por haya su plachinan.

Busca plachi di number
Despues di haci pago, e cliente por pasa busca su plachinan di number na e local den e edificio schuin dilanti di e oficina principal na Camacuri. No mester lubida di trece e recibo di pago y e prueba di seguro valido na momento di busca e plachinan.
E cliente cu a paga na oficina principal na Camacuri, por pasa busca su plachinan mesora. Pa e cliente cu a paga na Oficina di gobierno na San Nicolas, e por scohe pa pasa busca su plachinan di number mesora na Camacuri of e ta palabra cu e cahero ki dia e ta busca su plachinan na San Nicolas mes. Den e caso aki e cliente por busca su plachinan despues di un siman.
Un cliente no por busca su plachinan di number na Oficina di gobierno na Sta. Cruz of Paradera.

Tene cuenta!
E cliente cu a paga via banco no por busca su plachinan di number mesora, sino 3 dia despues di a haci pago. Ora di busca e plachinan e cliente ta presenta cu su recibo of printout di pago di internet hunto cu e prueba original di seguro valido (polisa). Si bin cu un copia mes esaki mester tin un stempel original di e compania di seguro of broker.

Servicio extra pa pago colectivo
Servicio di Impuesto tin un servicio extra pa e empresanan of grupo di persona/colega etc. cu kier paga mas cu 10 plachi di number. E grupo ta colecta e placa hunto cu tur e documentonan necesario (mira e parti di e rekisitonan menciona ariba) y ta apunta un persona kende lo percura pa haci e tramitenan. E persona encarga aki mester acudi na oficina principal na Camacuri y ta acudi na e bali di recepcion dilanti unda e lo haya e guia necesario.
Asina cu caba di registra e pagonan, Servicio di Impuesto lo tuma contacto telefonico cu e persona encarga pa busca e documentonan bek.

GERENCIA DI SERVICIO DI IMPUESTO
1 di december 2009