ORANJESTAD – Servicio di Impuesto ta recorda cu e ultimo termino di pago di grondbelasting 2009 ta caduca dia 31 di december 2009. Debi cu riba e fecha aki Servicio di Impuesto lo ta sera, e cliente por haci su pago sea riba e ultimo dia di trabou di aña esta dia 30 di december of riba e siguiente dia di trabou despues di dia 31 di december esta dia 4 di januari 2010. Servicio di Impuesto ta conseha su clientenan si cu ta preferibel pa haci pago dia 30 di december ya cu ta premira cu dia 4 di januari lo ta un dia hopi druk.

Termino legal di pago
Na momento cu un cliente ricibi su cobransa e por scohe pa haci e pago den un solo biaha of dentro di e terminonan legal. Aki ta sigui un skema di e terminonan legal di pago. 

Grondbelasting 2009 fecha 30 di juni 2009
Termino di pago	Ta caduca dia	Pago rekeri pa ley
Di prome y di dos termino	30 di juli 2009	50% di suma di cobransa pa cubri e prome y di dos kwartaal: jan - maart 2009 y april - juni 2009.
Di tres termino	30 di september 2009	25% di suma di cobransa pa cubri e di tres kwartaal: juli - sept. 2009
Di cuater termino (ultimo termino di pago)	31 di december 2009	25% di suma di cobransa pa cubri e ultimo kwartaal: oktober - december 2009.

Pues e prome, di dos y di dos termino di pago ya a caduca dia 30 di juli; e di tres termino tambe a
caduca caba dia 30 di september ultimo. E di cuater termino di pago lo caduca dia 31 di december 2009. Esaki ta nifica cu na e momentonan aki e clientenan lo mester tin minimo 75% di e cobransa paga.

E cliente cu no por paga su cobransa dentro di terminonan legal, por haci un peticion pa areglo di pago.
Ta consehabel pa haci e peticion aki mas pronto posibel si, pa evita cu Servicio di Impuesto ta continua
cu e proceso di cobramento cu gradualmente por bira mas severo. Pesey Servicio di Impuesto ta haya cu ta sumamente importante pa tene cuenta cu e terminonan aki ya cu de lo contrario esaki por tin
consecuencia indeseabel pa e cliente.

Si no cumpli cu pago (na tempo)
Den caso cu e cliente no paga manera rekeri pa ley, e ora Servicio di Impuesto lo continua cu e proceso
di cobramento automaticamente despues cu un termino di pago caduca. Mescos ta conta pa e cliente cu no a paga suficiente of no a cumpli cu su areglo di pago.
E proceso di cobramento ta encera cu e cliente lo ricibi por ehempel un aanmaning, un ordo di retencion
riba salario (loonvordering) of dwangschrift. E proceso di cobramento gradualmente por bira mas severo y tur cos ta depende te con leu e cliente mes ta laga e proceso aki continua. Pues e cliente mes por evita un aanmaning, ordo di retencion riba salario etc.

Mas informacion
Ta consehabel pa tene cuenta cu e terminonan legal di pago y haci e pagonan manera ley ta stipula.
Esaki ta importante pa evita cualkier inconvenencia.
Pa mas informacion encuanto e cobransa of areglo di pago, por acudi na seccion Servicio pa cliente na
oficina principal situa na Camacuri 2 of na Oficina di gobierno na San Nicolas.

GERENCIA DI SERVICIO DI IMPUESTO
22 di december 2009