No mester lubida di trece prueba di seguro ora di busca e plachinan

ORANJESTAD – Servicio di Impuesto ta participa na e clientenan cu tin cu paga nan impuesto
di vehiculo di motor (motorrijtuigenbelasting) di aña 2010, cu ainda tin chens pa paga e
impuesto e aña aki y asina evita rij largo otro aña. Pa loke ta trata e plachinan di number ta
necesario pa presenta e prueba di pago y e prueba di seguro valido na momento di busca e
plachinan.

Pago na Servicio di Impuesto
Por haci pago sea na oficina principal na Camacuri of na un di e oficinanan di gobierno na San
Nicolas, Santa Cruz of Paradera. Alabes tin posibilidad pa haci pago via banco.

Orario di caha
Na Camacuri di dialuna pa diabierna: mainta di 7:45 pa 11:45 y atardi di 1:15 pa 3:30.
Na Oficina di gobierno San Nicolaas, Santa Cruz of Paradera di dialuna pa diabierna: mainta di
8:30 pa 11:45 y atardi di 12:15 pa 2:45. Dia 23 y 30 di december e orario lo ta diferente.

Con por haci pago?
E cliente por paga sea cu placa cash, “debit card” (maestro), bankcheque of kassiercheque.
Tene cuenta cu pa impuesto di vehiculo di motor no ta posibel pa paga cu cheque personal.

Rekisitonan ora di haci pago
Pa haci e servicio mas eficiente y lihe Servicio di Impuesto ta pidi su clientenan pa no lubida di
trece:
1. Prueba di registro di e vehiculo di Servicio di Impuesto.
2. Recibonan di pago di aña 2009.
3. Permiso valido pa plachi B, TX, V, O y T.

E clientenan cu ainda debe impuesto di aña 2009 lo mester caba di paga esaki prome cu paga
e impuesto di aña 2010.
Pa plachi di number cu ta exigi un permiso (vergunning) manera bus, taxi, v-auto, plachi “O” y
“T”, e cliente/portador di e permiso por haci pago unicamente na e oficinanan di Servicio di
Impuesto.

Prueba di seguro valido
Tur cliente mester tene na cuenta cu su vehiculo mester ta sigura sino e no por ricibi su
plachinan di number. Ora di busca e plachinan di number, mester presenta cu e polisa di
seguro di e compania di seguro. Si bin cu un copia mes esaki mester tin un stempel original di e
compania di seguro of broker riba dje. E seguro mester ta valido entrante 4 di januari 2010.
Esaki ta nifica cu si e seguro ta caduca prome cu e fecha aki, e cliente no lo ricibi su plachinan.

Tene cuenta!
E cliente cu a paga via banco no por busca su plachinan di number mesora, sino despues di 3
dia di trabou cu a efectua e pago. Ora di busca e plachinan e cliente ta presenta cu su recibo of
printout di internet hunto cu e polisa di seguro.

Ta bon pa tene cuenta cu den e dianan venidero Servicio di Impuesto su dianan di servicio lo ta
diferente.

GERENCIA DI SERVICIO DI IMPUESTO
22 di december 2009